Glutenfritt brød med kikerter

Glutenfritt brød med kikerter høyrest kanskje litt spesielt ut men det gjer at glutenfri bakst vert både saftig og smakfull. Deiga er veldig smidig og enkel å jobbe med. Derfor kan ein bruke ho som grunnoppskrift og variere i det uendelege. Eg har laga både kvardagsbrød, horn, rundstykkjer og fletteloff for å nemne noko.

Tipset om å bruke kikerter fekk eg av Frie Kaker si oppskrift på fletteloff som eg fann i eit matblad ein gong. Oppskrifta har eg justert litt fordi eg opplevde at brøda fort vart litt rå og tunge. Kikertene gjer at brødet ikkje vert så fort tørt og det smular heller ikkje noko særleg. Det held koken sjølv etter ein dag på benken og mettar lenge. Derfor fungerer brødet ganske bra i matpakken.

Oppskrifta er forresten også heilt utan mjølk og egg.

Ingrediensar til 3 stk brød i brødformer på 1,5 liter

900 g kokte kikerter frå boks (eg brukte 4 boksar frå Eldorado)

8 dl kaldt vatn

50 g gjær eller 1 pk tørrgjær

2 ss fiberhusk

0,5 dl olje eller smelta smør

1 ts salt

1 ss sukker (kan sløyfast)

2 ts bakepulver (kan sløyfast)

ca 900 g glutenfritt mjøl (mellom 800 og 1 kg alt etter type mjøl)

Opne kikertboksane og hell av laken. Skyll kikertene litt i eit dørslag og ha dei over i ei kaserolle. Fyll opp med vatn til det dekkjer kikertene og kok opp. La det koke eit par minutt. Tøm kikertene attende i dørslaget og la dei renne litt av. Mos dei varme kikertene saman med det kalde vatnet, enten i ein blender eller ei matmølle, eller ved å bruke stavmiksar direkte i bakebollen. Sjekk at temperaturen er komen omtrent ned til kroppstemperatur. Er det litt i varmaste laget så la det stå og avkjøle seg litt før du rører inn gjær og fiberhusk. Eg brukar ofte stavmiksaren til dette også. La blandinga stå og svelle i 10 minuttar. Ha i olje, salt, og sukker. Rør inn bakepulver og elt inn det glutenfrie mjølet litt og litt for å eventuelt kunne justere om det vert naudsynt. Konsistensen skal vere slik at deiga akkurat ikkje er klissete men samtidig ikkje tørr og hard. Bruk gjerne kjøkkenmaskin med k-krok/grind til å sette deiga for å sleppe å elte for hand.

Dekk til bakebollen og la det stå og heve i ein time. Ta ut deiga og del i tre like emner. Form til brød og ha gjerne over i smurde brødformer. Etterhev i 30 minutt. Steik på rist nederst i omnen på 200 grader i 45 minutt. Ta dei ut av formene og avkjøl på rist.

Alternativ

• For grovare variant så kan noko av mjølet bytast ut med havregryn, bokkveitemjøl, frø eller kjerner. Eg brukar ofte litt av kvart av det eg har liggjande i skapet.
• Når eg lagar loff så har eg vanlegvis brukt Toro lys glutenfri mjølblanding eller Semper fin mjølmiks. Pensle gjerne med vatn og strø valmuefrå på toppen
• Om ein ikkje har behov for at brødet skal vere glutenfritt så kan ein droppe fiberhusk og heller bruke spelt. Då er det lurt å prøve seg fram med mjølmengda. Deiga skal ikkje vere klissete men heller ikkje tørr og hard.
• Ein kan droppe å koke opp kikertene og heller bruke kokande vatn. Men det kan medføre at nokre av kikertene ikkje vert skikkeleg mosa.

Tips

• Bruk deiga til litt forkjellig på same tid. For eksempel kan ein dele deiga i 3 og lage brød, rundstykkjer og horn. Steikjetida på horn og rundstykkjer vil vere rundt 15 minutt midt i omnen.
• Oppskrifta kan også brukast til focaccia eller som pizzabotn.
• Ta vare på laken frå kikertene om du brukar ferdig kokte kikerter på boks. Kikertlake er nemleg i glimrande eggerstatning og kan frysast.