Halvgrovt glutenfritt surdeigsbrød i form

Eg har stort sett laga runde grytebrød når eg har bakt glutenfrie surdeigsbrød, men her kjem oppskrift på eit glutenfritt surdeigsbrød i form. Det går relativt raskt å røre saman og det hevar i brødforma. Pass på å smøre forma godt sånn at brødet ikkje vert hengande fast.

Oppskrifta er i tillegg til å vere glutenfri også utan mjølk og egg.

Ingrediensar

5 dl kaldt vatn
100 g glutenfri surdeigstartar
10 g fiberhusk/psyllium
2 ss olivenolje eller smelta mjølkefri margarin
100 g glutenfrie havregryn
50 g bokkveitemjøl
150 g grov glutenfri mjølblanding, eg brukte Møllerens grove glutenfrie mjølblanding
200 g fin glutenfri mjølblanding, eg brukte Møllerens fine glutenfrie mjølblanding
1 ts salt

Ha vatn og surdeigstartar i ein bakebolle og bland godt. Visp inn fiberhusk og la det stå og svelle i rundt 5 minutt. Ha i olje, havregryn og mjølet og elt det godt saman. La deiga stå og kvile ein halvtime og bland så inn saltet.

Smør ei brødform som tek minst 1,5 liter godt og bruk ein slikkepott eller ei deigskrape til å fordele deiga i forma. Dekk til forma, eg brukar å sette forma i ein brødpose og blåse litt luft inn før eg set på ei klemme i enden. Sett til heving i romtemperatur i rundt 8 timar til brødet har heva godt, eg lot det stå over natta.

Alternativt kan ein la det stå i romtemperatur i rundt 4 timar og så ha det i kjøleskapet til det passar å steikje det dagen etter.

Steikast nederst i omnen på 220 grader i 45-50 minutt. Avkjøl brødet heilt på rist før oppdeling.

Alternativ

• Bokkveitemjøl kan erstattast av quinoamjøl, rismjøl eller meir av den grove mjølblandinga.
• Glutenfrie havregryn kan bytast ut med hirseflak
• Har du dårleg tid så ha saltet i deiga med ein gong. Det fungerer heilt fint.
• Ha i ein neve frø om du ynkjer det. I så fall kan mengda havregryn reduserast tilsvarande.

Tips

• Del brødet opp i skiver og frys ned. Dei tinar raskt i brødristar eller på benken.
• Smør på frosne skiver til nista så held skivene seg ferske fram til lunsj.