Havrekjeks med surdeig

Havrekjeks med surdeig

Magevennlege og fantastisk gode havrekjeks med surdeig. Faktisk så kan eg ikkje bake desse så ofte fordi eg då går og knaskar på dei titt og ofte. Oppskrifta er sterkt inspirert av Tine si oppskrift på havrekjeks men tilpassa surdeig og ein sensitiv mage

 

Ingrediensar til rundt 50 stk

250 g smelta smør
1,5 dl mjølk, eg brukte havremjølk
75 g surdeigstartar
250 g havregryn, eg brukte store havregryn.
150 g sukker,  eg brukte rårørsukker
1 ts salt
2 ts bakepulver
1 ts natron
100 g sammalen fin spelt
150 g sikta spelt

Smelt smøret i ei kasserolle og bland inn mjølka. Rør inn surdeigstartar og havregryna. La det stå og trekkje i minst ein halvtime, eg lot det stå over ein time sidan eg brukte store havregryn.
Bland inn resten av ingrediensane til ei ganske fast deig og la det stå i romtemperatur i rundt eit par timar. Sett deiga i kjøleskapet i minst 6 timar og ta ho ut rundt ein halvtime før utbaking slik at ho ikkje vert så hard å kjevle ut.

Ha litt mjøl på benken om nødvendig og kjevle ut til tynne kjeks. Rut opp med ein kniv eller eit pizzahjul, eller stikk ut runde med eit glas eller ei peparkakeform. Bruk ein steikjespade eller ei deigskrape og ha kjeksa over på ei steikjeplate med bakepapir. Prikk gjerne med ein gaffel for å få dei ekstra sprø.
Steikjast midt i omnen på 170 grader i rundt 15-20 minutt eller til dei er gyldne. Vert dei veldig brune og er framleis mjuke kan ein tørke dei på 100 grader til dei er sprø. Hugs at dei er litt mjuke når dei er nysteikte men det går over når dei kjem over på rist og vert kalde.

 

Alternativ
  • For ekstra sprø kjeks kan ein byte ut den eine teskeia bakepulver med hjortetakksalt.
  • Spelt kan bytast ut med same mengd av sikta kveitemjøl og fint sammale kveitemjøl
  • Havrekjeksa vert mjølkefrie om ein nyttar plantebaserte mjølkeprodukt.
  • Sukkeret kan bytast ut med andre typar søtt som kokosblomstsukker eller sukrin gold.
  • Ein kan ha i ulike typar krydder som kanel eller tørka ingefær for å få ulik smak.
  • Deiga kan settast rett i kjøleskapet og stå der i ein dag eller to om ein ikkje skulle rekke å heve litt i romtemperatur fyrst eller rekk å bake ut når ein har tenkt.

 

Tips
  • Havrekjeks med surdeig er perfekt å ta med seg på tur i ein tett boks.
  • Kjeka er nydeleg med smør og ost. Gjerne med ein kopp te attåt.

6 kommentarar

    • Solgåva

      Hei.
      Eg brukar aktivert surdeigstartar.
      Det går nok fint å ta surdeigstartar rett frå kjøleskapet også sidan den ikkje er det viktigaste hevemiddelet her. Men det kan kanskje vere ein liten fare for at dei vert litt syrlege på smak om surdeigstartaren har stått lenge etter siste mating.

      Lukke til med baksten.
      Helsing Sunniva

  • Kristin Sundgård Volden

    Takk! Og du har helt rett, man kan ikke lage de for ofte for man spiser de bare opp Skal teste om de er bra til bunn i ostekake. Finner mye godt her på bloggen din, virkelig et koselig sted å lese

    Kristin

    • Solgåva

      Hei!
      Tusen takk! Det set eg stor pris på å få høyre.
      Godt at det ikkje berre er her i huset at havrekjeksa forsvinn i eit raskt tempo.
      Med heimelaga havrekjeks i botnen må det garantert verte ei fantastisk god ostekake. Send meg gjerne ei melding om korleis det gjekk.

      Helsing Sunniva

  • may skjærvø

    Hei, syntes dette ble en tørr deig, eller ikke tørr, men den smuldret veldig og revnet fort ved kjevling. Skal det være slik?

    • Solgåva

      Hei.
      Den skal ikkje vere tørr og smuldrete nei. Kan vere at mjølet eller havregryna har trekt til seg meir vatn enn dei sortane eg har brukt.

      Du kan prøve å kna inn litt ekstra vatn til deiga heng saman og sjå om det gjer susen. Eventuelt la deiga stå litt i kjøleskapet etterpå.
      Håpar det vert vellukka for kjeksa er veldig gode.

      Helsing Sunniva

Legg att ein kommentar

Epostadressa di blir ikkje synleg. Påkravde felt er merka *