Ingefærshot i fire variantar – med eller utan fermentering
Det kan gjere godt med ein eller fleire ingefærshot om ein er ruskete i halsen eller prøvar å halde forkjølinga på avstand. I periodar kor eg kjenner at eg kanskje bryggar på noko brukar eg å ta ein støyt morgon og kveld. Om det hjelp veit eg ikkje heilt sikkert men det smakar uansett godt og er varmande. Når ein har i bær vil det også tilføre ekstra antioksidantar som kan vere bra når ein kjenner at ein bryggar på noko.
Ein kan også gjere drikken ekstra probiotisk ved å fermentere ingefærshoten. Sidan tarmen er ein del av immunforsvaret vil eg tru at det kan vere lurt om ein vil halde seg frisk. Oppskrift på fermentert ingefærshot står lenger nede i innlegget.
Ingefærshot
40 g fersk ingefær i skiver
3 dl vatn
Safta av ein sitron eller lime
1 ss honning
Ha alt saman i ein blender og la det køyre i eit minutt eller to til alt er ganske godt oppløyst. Sil blandinga i gjennom ein testil eller liknande. Bruk ei skei til å presse ut safta av massen. Ha over i eit glas eller ei flaske. Rør eller rist flaska eller glaset før bruk slik at ingefæren fordelar seg før bruk.
Ingefærshot med blåbær
20 g fersk ingefær i skiver
2 dl vatn
1 ss honning
Safta av ein sitron eller lime
50 g blåbær
Ha alt saman i ein blender og la det køyre i eit minutt eller to til alt er ganske godt oppløyst. Sil blandinga i gjennom ein testil eller liknande. Bruk ei skei til å presse ut safta av massen. Ha over i eit glas eller ei flaske.
Ingefærshot med bringebær
50 g fersk ingefær i skiver
3 dl vatn
Safta av ein sitron eller lime
1 ss honning
50 g bringebær
Ha alt saman i ein blender og la det køyre i eit minutt eller to til alt er ganske godt oppløyst. Sil blandinga i gjennom ein testil eller liknande. Bruk ei skei til å presse ut safta av massen. Ha over i eit glas eller ei flaske.
Ingefærshot med kiwi
35 g fersk ingefær
1 kiwi utan skal
Saft av ein sitron eller lime
1 ss honning
2 dl vatn
Ha alt saman i ein blender og la det køyre i eit minutt eller to til alt er ganske godt oppløyst. Sil blandinga i gjennom ein testil eller liknande. Bruk ei skei til å presse ut safta av massen. Ha over i eit glas eller ei flaske.
Fermentert ingefærshot
Lag ingefærshot etter ei av oppskriftene over.
Ha i 1-2 ss startkultur. Det kan vere kombucha, vannkefir, ingefærølstartar (gingerbug), upasteurisert eplecidereddik eller myse og la det stå i romtemperatur i eit døgn før det settast kaldt.
Myse får ein ved å sile kefir eller yoghurt naturell gjennom eit kaffifilter eller eit finmaska klede. Det er den blanke væska som er mysa.
Alternativ
- Alt eller delar av vatnet kan bytast ut med eplemost eller juice for ein søtare variant.
- Honning kan bytast ut med sukker eller lønnesirup.
- Ein kan nytte sukrin for sukkerfri variant men då er det lurt å droppe fermenteringa sidan sukkeret trengst i fermenteringsprosessen.
- For andre smakar kan ein bruke ulike typar frukt og bær. Eple, pære, ananas eller skogsbær kan vere gode alternativ.
Tips
- Massa som vert att kan ein ha i smoothie. Eg brukar å ha det i grøn smoothie.
- Bland vatn med kolsyre i ingefærshoten for å få ein slags mild ingefærbrus.
- Ein kan blande ut med litt eplemost om ein tykkjer at det vert for sterkt.
