Kaldbrygga iste

Å lage kaldbrygga iste er veldig enkelt og lettvint. Når ein brukar kaldbrygging vert det også ein friskare og mindre beisk smak enn når ein set kokt te til avkjøling. Det meste av te kan brukast og det er ein super måte å få brukt opp dei sortane te som alltid att står bakerst i skapet.

Ingrediensar til 1 liter kaldbrygga iste

1 liter kaldt vatn

2 posar valfri te, eg brukte grøn te med sitron

Nokre isbitar til servering (kan sløyfast)

Eventuelt ei skive sitron eller litt frisk mynte om du har det.

Ha vatn og teposar i ei mugge eller ein karaffel og sett i kjøleskapet i minst 4 timar, eg lot det stå over natta. Ta ut teposane og ha i isbitane før servering.

Teen vert beiskare dess lenger han står så det er lurt å smake litt undervegs sidan det er ulikt kor sterke dei ulike tesortane er. Fruktte og urtete kan truleg trekke lenger enn svart og grøn te.

Alternativ

• Ynskjer du søtare iste kan du røre inn litt sukker eller lønnesirup.
• Brukar du te i lausvekt tilsvarar ein tepose omtrent ei stor skei te.
• Bland gjerne ulike sortar te som mango og appelsin eller ingefær og sitron.

Tips

• Ha gjerne oppi ein liten neve bær, både friske og frosne fungerar.
• Har du tilgong på mynte, sitronmelisse eller andre friske urter kan det også brukast.