Lyst surdeigsbrød med havre

Eg brukar stort sett den same grunnoppskrifta og framgongsmåten når eg bakar surdeigsbrød og denne gongen vart det eit lyst surdeigsbrød med havre.

Ved å ha litt havregryn i deiga får brødet litt meir smak og vert endå saftigare enn ein rein loff. Det beste resultatet syns eg at eg får når eg lagar grytebrød, men du kan også steike på steikeplate eller i brødform om det passar betre.

Her i huset brukar vi lyst surdeigsbrød med havre til alt mogeleg, men det er ekstra godt attåt suppe eller godt pålegg som roastbiff eller reker.

Ingrediensar til eit brød

4,5 dl (450g) kaldt vatn

100 g surdeigstartar

50 g havregryn

600 g sikta spelt eller kveitemjøl

5 g salt

Ha vatn og surdeigstartar i ein bakebolle. Rør raskt inn havregryn og alt mjølet. La det stå rundt ein halvtime, men gjerne opp mot ein time om du har tid til det. Strø over saltet og knip det godt inn med vatn på handa. Strekk og brett ved å ta tak i eine enden av deiga og dra over til motsett side av bakebollen. Gjer dette heile vegen rundt. La deiga stå i ein halvtime og brett og strekk på nytt. Strekk og brett to gongar til, totalt fire gongar. Bruk gjerne vatn på handa så slepp du at det klissar så mykje.

Strø litt mjøl over deiga og form til eit rundt brød. Legg deiga i ei hevekorg med litt mjøl, eg har som oftast i eit klede i hevekorga som eg strør litt mjøl oppi. Brukar du mjøl rett i hevekorga er rismjøl eller byggmjøl gode alternativ.

Sett deiga til heving i kjøleskapet til dagen etter.

Sett ei støypejernsgryte inn i kald steikeomn og varm opp til 230 grader (over-undervarme). Tøm brødet forsiktig over på eit bakepapir. Snitt gjerne brødet for å styre sprekkinga, minimum eit snitt på toppen. Ta den glovarme gryta ut av omnen og løft bakepapiret med brødet forsiktig over i gryta ved å halde i hjørna på bakepapiret. Ha på loket og sett gryta i omnen. Steik i 30 minutt. Ta av loket og steik vidare i 15 minutt. Avkjøl på rist.

Alternativ

Havregryn kan bytast ut med frø, hirseflak eller meir sikta mjøl.
Har du ikkje tid til å bale med å strekke og brette deiga så går det an å droppe det og la deiga berre heve i fred i bakebollen til det formast og ein har det over i hevekorg. Det vert litt mindre spenst i deiga og brødet vert litt meir utflytande men resultatet vert likevel brukbart.
Har du ikkje hevekorg kan du legge eit klede i eit dørslag eller ein bakebolle i staden.
Om ein ikkje ynskjer å heve i kjøleskapet kan ein heve brødet i romtemperatur til omtrent dobbel storleik. Dette tek kanskje rundt 5 timar, men vil variere etter kor varmt det er.
Om ein ikkje vil bruke bakepapir så kan ein strø litt mjøl i botnen av støypejernsgryta før ein kvelvar deiga opp i gryta.
Om ein heller steiker brødet på steikebrett så tømmer ein deiga over på brettet og snittar deiga. Steikast midt i omnen i 45 minutt. Ha gjerne ei lita eldfast form med kokande vatn i omnen for å lage damp den fyrste halvtimen. Avkjøl på rist.
I staden for å bruke hevekorg kan ein ha deiga direkte over i ei smurt brødform på 2 liter og sette til heving i kjøleskapet i den. Då set ein forma direkte i varm steikeomn og reduserer varmen til 210 grader etter 15 minutt. Steikast i rundt 45 minutt og kvelvast over på rist for avkjøling.

Tips

Del brødet på midten og så kvar halve i skiver på tvers før du frys dei ned. Då passar skivene til å varme opp i brødristaren direkte frå frysaren.
Ein kan lage småbrød eller rundstykker av same oppskrifta. Då kan ein heve deiga i bakebollen i kjøleskapet og tømme ho forsiktig over på kjøkkenbenken. Då bør ein ha litt godt med mjøl under slik at deiga ikkje set seg fast. Dra deiga forsiktig utover og del opp i passe store emner. Sett ei over på ei steikeplate med bakepapir og steik midt i omnen på 220 grader i rundt 15 minutt.