Omnsteikte rotgrønsaker

Om hausten når dei norske grønsakene er i sesong vert det omnsteikte rotgrønsaker til middag opptil fleire dagar i veka. Det er utruleg godt og enkelt å lage. Det passar også til det meste av steikt mat. Ofte kan ein ha fisk eller kjøt saman med grønsakene i omnen den siste tida så har ein ferdig middag i same forma. Det er forresten nydeleg med rømmedressing eller aioli attåt omnsteikte grønsaker.

Det er ikkje så nøye å følge måla i denne oppskrifta. Bruk dei grønsakene du likar eller har tilgjengeleg. Det viktigaste er at grønsakene vert kutta i bitar som gjer at dei vert ferdige omtrent på same tid.

Ingrediensar til 4 personar

Rundt 1,5 kg ulike rotgrønsaker

Eg brukte:

3 raudbetar

2 gulbetar

1 stor polkabete

1 lita sellerirot

2 store pastinakkar

2-3 ss smør eller olivenolje, eg brukar stort sett smør

2 ts tørka timian

1 ss salt, eg brukte Maldonsalt

Skrell og del alle rotgrønsakene i nokolunde like store bitar. Ha grønsakene i ei eldfast form eller ei langpanne. Ha på smør/olje, krydder og salt. Bland det litt saman. Eg brukar som oftast å legge på smøret med ostehøvel.

Steikjast midt i omen på 180 grader i rundt 40 minutt eller til grønsakene er møre. Rufs litt i grønsakene av og til undervegs.

Alternativ

Timian kan bytast ut med andre sortar krydder. Rosmarin eller berre pepar fungerer fint.
Omnsteikte rotgrønsaker kan lagast av dei fleste sortar rotgrønsaker så lenge dei er delt opp i ganske like store bitar. Lauk i båtar er også godt saman med grønsakene.
Bruk gjerne varmluft for litt meir steikjeskorpe på grønsakene.