Sarah Bernhardt

Eg smakte ikkje Sarah Bernhardt før eg var i 20-åra. Men då fekk eg til gjengjeld skikkeleg smaken på dei. Eg har seinare forstått at eg var utruleg heldig med dei kakene eg fekk servert. Det finst fleire måtar å lage desse mektige konfektkakene på og for meg som er ganske kresen i kakevegen så har ingen kunne måle seg med dei fyrste eg smakte. Derfor vart eg glad då eg fekk tak i oppskrifta og kunne lage dei sjølv. Sarah Bernhardt var fransk skodespelar og har gitt namn til kakene. Dei fleste vel å skrive namnet utan t til slutt, men eg nyttar den opprinnelege skrivemåten med t.

Oppskrifta er naturleg glutenfri og enkel å gjere mjølkefri.

Ingrediensar til rundt 40 kaker

Botn:

400 g malte mandlar (pluss litt til dersom massa vert for tynn, ca 50g)

3,5 dl melis

3 eggekviter

Smørkrem:

3 eggeplommer

150 g romtemperert smør

1 ss melis

2 ts pulverkaffi oppløst i 2 ts vatn eller sterk kaffi

1 plate kokesjokolade

Glasur:

200 g kokesjokolade

1,5 ss nøytral olje (delfiafeitt eller kokosolje)

Mandelbotn:

Mal mandlane og bland i melis. Rør inn eggekvitene til ei jevn mandeldeig. Vert deiga for tynn; meir mandlar. Er deiga for tjukk; meir melis. Det er lurt å prøvesteikje ei kake for å sjå om deiga er passe. Fordel deiga med ei skei ut på ei steikjeplate med bakepapir. Lag kakene gjerne litt flate på toppen. Steik i 10 minutt midt i omnen på 200 grader. Avkjøl på rist.

Sjokoladekrem:

Pisk romtemperert smør, melis og eggeplommer til smørkrem. Smelt kokesjokolade i vannbad og og bland i kremen. Ha i kaffien og bland godt saman. Sett til avkjøling til kremen får smørekonsistens.

Ha sjokoladekremen på mandelbotnane enten med ein smørekniv eller kakesprøyte. Sett kakene i frysaren i minst ein time.

Glasur:

Smelt sjokoladen og rør inn oljen til glasuren vert jamn. Dypp dei frosne kakene raskt i glasuren slik at det vert glasur utanpå sjokoladekremen. Sett kakene kaldt til glasuren har stivna.

Alternativ

Kakene vert mjølkefrie ved å bruke mjølkefritt smør i kremen og sjokolade utan mjølk. Coop sin kokesjokolade er eit godt mjølkefritt alternativ.
Bruk mørk sjokolade for kraftigare sjokoladesmak
Mandlane kan bytast ut med neter eller solsikkekjerner. Solsikkekjernene kan då bli litt grøne etter steikjing.
Ein kan gjerne bløytleggje mandlane og tørke dei før bruk. Dette for å bryte ned fytinsyra som kan irritere om ein har ein sensitiv mage. Framgongsmåte bløytleggjing: Legg ein mandlane i ei skål og dekk med kaldt vatn. Rør inn ei skei surdeigstartar eller ei ss salt og gjerne ein skvett eddik. La det stå i romtemperatur i minst 10 timar og skylj mandlane godt i rennande vatn. Tørk godt av dei med litt kjøkkenpapir. Ha dei over på eit steikjebrett med bakepapir og tørk dei i stekjeomnen på 100 grader i minst 2 timar eller til dei er skikkeleg tørre. Ein kan også la det stå på 50 grader i rundt 12 timar og då gjerne med omnsdøra på gløtt.