Surdeigspai – Quiche med surdeig

Eg har servert ganske mange versjonar av surdeigspai med blaut botn. Sidan pai er noko av det beste eg veit så vart eg utruleg glad då eg endeleg fekk til ein botn med surdeig som faktisk blei sprø. Ved å bruke surdeig så vert paien meir magevennleg og smaken vert i tillegg mykje betre etter mi meining.

Utgangspunktet for oppskrift på paibotn fann eg hos NRKmat.

Eg toler mjølkeprotein dårleg så eg lagde mjølkefri surdeigspai. Forslag til alternativ står under oppskrifta.

 

Ingrediensar til ei paiform på 24-26 cm i diameter

Paibotn med surdeig:

250 g sikta mjøl, eg brukte spelt

125 g smør i terningar, eg brukte melange utan mjølk

0,75 dl (75 g) kaldt vatn

25 g surdeigstartar, eg tok ei skei rett frå kjøleskapet

 

Ha mjøl og smør i ein bakebolle og smuldre det raskt saman med hendene. Rør ut surdeigstartaren i vatnet og og kna dette godt inn i deiga. Ha i litt meir mjøl om nødvendig. Deiga skal vere fast og ikkje klissete. Dekk til bakebollen og la deiga stå i romtemperatur i rundt 8 timar. Sett så deiga i kjøleskapet i minst ein time slik at ho vert kald for då er ho enklare å bake ut. Alternativt kan ein la deiga stå i romtemperatur i berre 2-3 timar og så sette henne i kjøleskapet til dagen etter.

Kjevle ut deiga med litt mjøl på benken og legg over i ei paiform. Prikk heile botnen med gaffel. Steikjast på 180 grader nederst i omnen i rundt 10 minutt.

Ha i valfritt fyll og steik vidare i rundt 30 minutt eller til paien er ferdig.

 

Fyll:

1 purre

3 store champingnon

200 g kokt skinke i terningar

100 g riven ost (kan sløyfast)

4 egg

2 dl fløyte

1 ts timian

2 ts salt

1 ts pepar

 

Del purren i ringar og soppen i små terningar. Fres dei raskt i ei steikepanne med litt smør eller olje til purren er vorten mjuk og soppen har slept litt væske.

Legg skinke, purre og sopp i den forsteikte paibotnen og strø over osten.

Pisk egga lett saman og ha i fløyten og krydderet. Tøm eggeblandiga over fyllet og steik paien i rundt 30 minutt på 180 grader nederst i omnen.

 

Alternativ
  • Paien vert laktosefri ved bruk at laktosefrie mjølkeprodukt. Smør og ost inneheld lite laktose så der kan ein nytte vanlege variantar, men fløyten må vere laktosefri.
  • Mjølkefri surdeigpai får ein ved å nytte melange utan mjølk i botnen og veganske erstatningar for mjølkeprodukta. Eg har brukt Gryr matfløyel og Go vegan ost. Ha gjerne i ei klype salt saman med margarinet sidan det er utan tilsett salt.
  • Ein kan bruke kjøkkenmaskin med S-blad til å lage deiga. Då køyrer ein saman smør og mjøl til det har smuldra seg og har i vatn med surdeigstartar til slutt.
  • Fyllet kan endrast etter kvar ein har lyst på eller er i sesong. Prøv gjerne med kylling, laks, lammeskav eller reinsdyrskav. Litt fetaost eller bacon fungerer veldig godt å ha oppi i tillegg.

 

Tips
  • Paien smakar like godt kald og passar godt til å ha på kaldtbord.
  • Deiga kan frysast så om det vert litt til overs kan det leggast i frysaren og brukast seinare. Ein kan også lage dobbel porsjon og fryse halvparten så er det kjapt å lage surdeigspai når det skulle freiste.
  • Til surdeigspai passar det godt med ein salat av isbergsalat,  druer og melon i bitar. Ha gjerne litt balsamico på toppen.

Legg att ein kommentar

Epostadressa di blir ikkje synleg. Påkravde felt er merka *