Tomatsuppe
Heimelaga tomatsuppe tek faktisk ikkje så lang tid å lage og smakar utruleg mykje betre enn posevarianten. Lag gjerne trippel oppskrift og frys i porsjonar for raske middagar seinare. Suppa er naturleg glutenfri og enkel å gjere mjølkefri. Det er gulrøtene som jamnar suppa og tilfører litt sødme slik at det ikkje er nødvendig med sukker for å balansere tomatsmaken.
Ingrediensar til 4 porsjonar
2 ss smør eller olje
1 fedd kvitlauk, finhakka
2 stk sjalottlaukar, finhakka
1 liten chili, finhakka, kan sløyfast
2 store gulrøter, grovraspa eller i bitar
1 ss tomatpure
2 boksar hakka hermetiske tomatar
8 dl kraft eller buljong
1 dl fløyte av valfri sort
Salt og pepar etter smak
Eventuelt litt sukker for å justere sødme
Ha smør i ei gryte og fres lauken på middels varme til den er blank og mjuk. Ha oppi chili og kvitlauk og la det stå litt til. Skrell og rasp eller kutt opp gulrøtene i bitar i mellomtida. Ha dei oppi saman med det andre og la det surre litt vidare.
Tilsett tomatpureen og la det stå nokre minutt før du har oppi dei hakka tomatane. Kok opp, ha i krafta og kok opp på nytt. La det småkoke vidare til gulrøtene er møre.
Bruk stavmiksar og køyr til suppa vert jamn. Ha i fløyte og smak til med salt og pepar. Brukar du usalta kraft vil det vere behov for ein del salt. Spe med litt vatn eller meir kraft om suppa er i tjukkaste laget.
Alternativ
- Fløyten kan bytast ut med 2-3 ss kokosmjølk, kokoskrem (det harde på toppen av ein boks kokosmjølk) eller mjølk.
- Sjalottlauken kan bytast ut med gul lauk, raudlauk, purre eller vårlauk.
- Ha gjerne i andre grønsaker som paprika eller ferske tomatar.
Tips
- Ha pasta oppi suppa etter at den er jamna med stavmiksar og kok til pastaen er ferdig.
- Trekk pølsebitar varme i suppa heilt på slutten.
- Server med hardkokte egg og ein klatt rømme.
- Ha gjerne brød eller rundstykkjer til.
Kraft
